Et finalement , un peu de paix !
معلش أصلى لما بأزهق العرق الفرنساوى بينقح عليا.
المهم, الكتاب ظريف للناس اللى بتحب الكلام عن الفلاسفة زى أرسطو و أريستوفان و ديوجين و كانط و شوبنهاور و ليبنتز و غيرهم قديم و جديد.حسيت إن الكتاب ملوش علاقة بالعنوان العربى بتاعه ( فكر بنفسك ...عشرون تطبيقا للفلسفة) أولا لأنى لقيت ان كل الفلاسفة سابقى الذكر مسابوش حاجة غير و فكروا فيها فمعادش فيه سنتوفة تفكير جديد. ثانيا أنا معدتش ورا المؤلف علشان اتاكد انهم عشرون تطبيق فقط مع انى حسيت انهم أكتر من كده. الحلو فى الكتاب الأمثلة اللى فيه و عرض لبعض المواقف الطريفة و تطبيق مبادئ الفلسفة عليها, زى مثلا الموسيقى فرانك زابا اللى كان فى حوار تليفزيونى مع مذيع شاطر و سمج ليه ساق خشبية , فالمذيع بيقول لزابا أنا عندى انطباع ان شعرك الطويل ده مخليك بنت رد عليه زابا و قاله و أنا عندى انطباع ان رجلك الخشب دى مخلياك الترابيزة . يعنى رد عليه بنفس التركيبة اللغوية لعبارة المذيع الأصلية و يعتبر ده نوع من الإقلاب يعنى تغيير كلمة أو اتنين فى نفس الجملة ممكن يقلب المعنى تماما و ده اللى خلى الرد عبقرى . ده غير ان الكتاب مليان بشوية حاجات كده معرفش فيها كتير خاصة بالفلسفة و المنطق و الاحتمالات اللى بيدرسوها الطلبة فى ثانوى و دائرة أ متقاطعة مع دائرة ب تدى الاحتمال الفلانى ... الخ . بيفكرنى ده بمسرحية مدرسة المشاغبين طبعا و سؤال ما هو المنطق.
الكتاب فيه بورتريهات كاريكاتورية لفلاسفة كتير للرسامة ناديا بودا و ده خللى للكتاب طابع لايت و ظريف.
اللى خلانى أزهق من الكتاب إنى قريته على فترة طويلة جدا و ده خلى الكتاب يفقد ترابطه و خلانى مش فاكرة إيه اللى قريته منه قبل كده . أتمنى إنى أبقى أقراه تانى على رواقة.
