ماراثون معرض القاهرة الدولى للكتاب ال 41

الحمد لله وفقنى ربنا و طلعت رحلة معرض الكتاب اللى باستناها من السنة للسنة. فيه ناس بيقولولى (هو انتى ناقصة كتب ما انتى بتشترى طول السنة و مش حارمة نفسك , ايه يعنى سر السعادة و الاصرار على مرواح معرض الكتاب كل سنة؟) و للناس دى بقول ان اللى بيحبوا القراية زيي بيعملوا زى ما أنا بعمل , بيشتروا طول السنة و بيروحوا المعرض برضه , يعنى أنا ما بعملش حاجة غريبة. و بعدين فيه مثل بيقول (البحر بيحب الزيادة) , هو صحيح المثل ده معرفش جه منين لكن بيعبر عن الفكرة. ده غير إنه يوم مش هشوف فيه وش حد أعرفه و لا حد أعرفه هيشوفنى يعنى يوم أنونيمس من أوله لآخره و ده مصدر سعادة غريبة بالنسبة لى.( طبعا صاحبتى الصحوبة و صديقتى الصدوقة اللى معايا ع الحلوة و المرة بتيجى معايا كل سنة و ليها نفس اهتماماتى – غالبا – و الواحد ميقدرش يعمل أنونيمس على أصحابه الأنتيخ أبدا).
طلعنا من المنصورة الساعة 8 و ربع ووصلنا حداشر و ربع و دخلنا من البوابة فى لمح البصر- على غير العادة كل سنة و علشان كده قلت فى سرى خير اللهم اجعله خير. أول حاجة باعملها كل سنة إنى أروح للشروق , و لكن السنة دى اتبعت "فكر جديد" ( أوباااا اوع حد يفهمنى غلط أنا مش من جيل المستقبل دانا فى الدنيا من زمان) و قررت مع سارة – الأنتيخ سالفة الذكر فوق- إننا نروح على الهلال الأول. الفكرة إن فيه روايات كتير بتصدرها كذا دور نشر, و كل دور نشر بتصدرها بطباعة و تغليف و سعر متفاوت جدا عن باقى زميلاتها. يعنى روايات نجيب محفوظ و كتب توفيق الحكيم بتصدرها الشروق فى طبعة جميلة و قيمة و غالية عن طبعة دار مصر لعبد الحميد جودة السحار (و لو إن دار مصر غيرت السنة دى من شكل الأغلفة و بقى لونها دهبى). نفس الكلام ينطبق على دارى الشروق و الهلال. أحنا قلنا ندور فى الهلال و مصر على اللى احنا عاوزينه و اللى منلاقيهوش نشوفه فى الشروق .

فعلا فى دار الهلال ممكن تلاقى الروايات بأسعار متزيدش عن 8 جنيه , و ده بيخلى الواحد يشيل على قد ما يقدر . بس برضه الواحد ربنا لا يمكن يرحمه من العبط, كانت قدامى رواية صائد الفراشات اللى اتعملت فى فيلم أمريكى قديم و متاخد عنها مسرحية الحادثة المجنونة بتاعة عبلة كامل لو حد فاكر الفيلم أو المسرحية. المهم علشان كنت بادور على حاجات تانية ماخدتش بالى و مجبتش الرواية . ياللهبل!

و بعدين هو الرواية عندهم بتتطبع مرة واحدة و بعدها أوروفوار؟ رواية فيرونيكا تقرر أن تموت لباولو كويللو أصدرتها الهلال فى 99 , إيه المانع إنهم يصدروها تانى؟ دى تالت سنة أسأل عليها و ما ألقهاش عندهم, طبعا أنا ممكن ألقاها فى دور نشر تانية و بالذات الدور السورية و اللبنانية المهتمة بالترجمة بس هيبقى سعرها نار.
كان فيه ناس أجانب كتير فى المعرض زى كل سنة, أغلبهم من جنوب شرق آسيا من اللى بيييجوا يدرسوا فى الأزهر و المعاهد الإسلامية فى مصر , بصراحة بيكون شكلهم عسول جدا و هما شايلين كتب كتيرة و بيرطنوا باللغة بتاعتهم. كان من الأجانب اللى شفتهم واحد شاب أشقر و طويل لابس بدلة شيك و بالطو طويل ماشى مع اتنين ستات أجانب برضه و الراجل نازل تصوير فى أى حاجة تصادفه بكاميرا ديجيتال, لدرجة إنه راح كشك الاستعلامات و وقف قدام الناس اللى فيه و راح مصورهم من غير ما يقول أى كلمة و لا حتى إكسكيوز مى. الراجل ده الصراحة كان منظره مريب و حسيت إنه ممكن يكون جاسوس للموساد ( بيفكرنى الموضوع ده بتدوينة أشرف حمدى هنا) .

من أرخم الحاجت اللى لاحظتها السنة دى إنهم بيأجلوا عرض الكتب الجديدة فى المعرض لليوم اللى هيكون فيه حفلة توقيع للكاتب. يعنى مثلا بلال فضل ليه كتاب سكان مصر الأصليين تبع ميريت و كتاب ما فعله العيان بالميت تبع الشروق. الدارين محدش فيهم عرض الكتاب أصلا و مستنيين بلال فضل يوم 4-2 علشان التوقيع. طيب يا ظريف منك له و الناس اللى بتسافر للمعرض يوم واحد وضعها إيه؟ شوفوا كام نسخة كانت هتتباع لحد ما الكاتب ييجى حفلة التوقيع.

كان ليا الشرف إن محمد فتحى يوقع لى على كتابه الجديد مصر من البلكونة (اتخض لما لقانى واخدة نسختين و عاوزة توقيعه عليهم) .طبعا واحدة ليا و التانية لحد موصينى على الكتاب, بس هو كان عاوز يوقعلى النسختين باسمى برضه, يا سيدى و الله ما بتفرق معانا الأسماء.الحقيقة كتابه التانى بتاع الدعاة كان معايا برضه بس فى غياهب الشنطة اللى على ضهرى فقلت مفيش داعى للبهدلة و الدعبسة قدام الناس.

و فى النهاية بعد ما دراعاتى طولوا 3 سم من الشيل, اليكم قائمة الشوبنج ( 79 كتاب و مدحش يعد ورايا):
جر ناعم/ عمر طاهر
تلك العتمة الباهرة/ الطاهر بن جلون
الحمامة/ باتريك زوسكيند
كائن لا تحتمل خفته/ ميلان كونديرا
قطة على صفيح ساخن/ تينيسي ويليامز
الحضيض/ مكسيم جوركى
الزواج/ جورج برنارد شو
العائش فى الحقيقة/ نجيب محفوظ
قشتمر/ نجيب محفوظ
رأيت فيما يرى النائم/ نجيب محفوظ
بداية و نهاية/ نجيب محفوظ
حكاية بلا بداية و لا نهاية/ نجيب محفوظ
قصص من الكتب المقدسة/ عبد الحميد جودة السحار
مجدولين/ مصطفى لطفى المنفلوطى
حوار بين طفل ساذج و قط مثقف/ أحمد بهجت
فرج /رضوى عاشور
وراق الحب /خليل صويلح
الحرب فى بر مصر/ يوسف القعيد
يحدث فى مصر الآن/ يوسف القعيد
أربعة و عشرون ساعة فقط/ يوسف القعيد
غرفة تخص المرء وحده/ فيرجينيا وولف
المسيح يصلب من جديد/ نيكولا كازانتزاكيس
فى الحب و الحياة/ مصطفى محمود
السؤال الحائر/ مصطفى محمود
الأحلام /مصطفىمحمود
الزلزال/ مصطفى محمود
الإنسان و الظل/ مصطفى محمود
الأفيون/ مصطفى محمود
ما وراء النهر/ طه حسين
الاناجيل دراسة مقارنة/ أحمد طاهر
البيضاء/ يوسف إدريس
الفرافير/ يوسف إدريس
الطريق إلى زمش /محمود السعدنى
حبل الغسيل /على أحمد باكثير
أوديب الملك
تل الهوى/ يوسف أبو رية
ليلة عرس /يوسف أبو رية
صمت الطواحين/ يوسف أبو رية
نجوم فى عز الضهر/ يوسف معاطى
الست دى أمى /يوسف معاطى
نشتهى أمة الرزاق/ نعم الباز
تلابيب الكتابة/ صافيناز كاظم
القاتل خارج السجن /محمد سلماوى
تاريخ الملل و النحل /أمين الخولى
حكاوى شهرزاد/ زينب أبو الفتوح
كلام مرسل /خالد الصاوى
أجراس/ خالد الصاوى
أفتوكالايزو/ أسامة غريب
مزرعة الحيوانات/ جورج أورويل
القلعة/ أنطوان دى سانت أكسوبرى
مريم التجلى الأخير/ إبراهيم عيسى ( صورته على الغلاف و هو صغير بس بنفس الشنب و النضارة.. سبحان الله)
محب /عبد الفتاح الجمل
رأيت رام الله/ مريد البرغوثى
قمر على سمرقند/ محمد المنسى قنديل
بيع نفس بشرية/ محمد المنسى قنديل
الساعات/ مايكل كاننجهام
أنا الذى رأى /محمود سعيد
أبيض و أسود/ جورج صبرى
بابل مفتاح العالم/ نائل الطوخى
مصر من البلكونة/ محمد فتحى
دعاة يحكمون عقول/ المصريين محمد فتحى
بحب السيما/ نانسى حبيب
التابوت /صبيحة شبر
الحالة ميم/ محمد هشام عبية
نادما خرج القط /أحمد صبرى غباشى
مصر المفروسة/ محمود عطية
الصنم/ محمد علاء الدين
القدم/ محمد علاء الدين
كشرى مصر /حسن كمال
7 باب/ محمد عادل
الحافة /أحمد خالد توفيق
أحدهم هرب (www) /أحمد خالد توفيق
خمنوا معى (الأعداد الخاصة)/ أحمد خالد توفيق
أسطورة شبه مخيفة/ أحمد خالد توفيق
هم (سافارى)/ أحمد خالد توفيق
عبقرى آخر (فانتازيا)/ أحمد خالد توفيق
جمعية الباحثات عن عرسان
لورد جيم/ جوزيف كونراد
انتهاك/ ريتشارد ماثيسون

شاركونا بقوائم الشوبنج الثقافى اللى عملتوه فى معرض الكتاب.

تحديث: عن تلك المدونة المارقة...

التدوينة دى باين عليها ممسوسة و العياذ بالله , يمكن علشان دى أكتر تدوينة جالى عليها تعليقات :)

مش عارفة أحط رد على تعليقات الأصدقاء اللى ردوا , فعلشان كده هأرد عليهم هنا...

مختار العزيزى: رواية كونديرا من دار الوليد و هى دار سورية أو لبنانية حسبما أذكر, و الرواية طبعة المركز الثقافى العربى

littilemo : أنا قريت حوالى نصف رواية فيرونيكا من على النت و عجبتنى و كنت عاوزة أجيبها كتاب مطبوع , أما 11 دقيقة فأنا قريتها كاملة و ما شفتش إنها حلوة زى ما الناس بتقول عليها. حاج كومبيستلا و فالكيرى لسه ما قريتهمش خالص بس شكرا على ترشيحاتك و إن شاء الله أشوفهم قريب

lastoadri : بصراحة أنا مبحبش الترجمات السورية و اللبنانية للروايات الأجنبية لأن ساعات مبفهمش حاجة منها , زى مثلا (على نهر بييدرا جلست و بكيت)بتاعة كويللو كانت ترجمتها فظيعة من دار نشر مش فاكرة اسمها فى دمشق خلتنى كنت عاوزة أولع فى الرواية و فى نفسى بالمرة. انتى عارفة بقى نظام (الشراشف) و (التنورة) و الكلام ده . بس انتى بجد آنستى و شرفتى المدونة و عاوزاكى تقوليلى بصراحة :هو انتى بعد ما كتبتى تعليقك أخدتى الباب فى ايدك عشان كده مش عارفة أحط تعليقى على التدوينة المنحوسة دى ؟ :)